Euskalmetek egindako iragarpen ofizialaren arabera goizean "zerua oso hodeitsu" egongo omen da. Alabaina, AEMETek hodei gutxi iragarri ditu. Arratsalde partean, dena dela, hodeitza txikituz joango dela dio EAE mailako agentziak, gauean zerua hodei gutxirekin geldituko delarik. Mendebaldetik egingo du ufa Eolok, ahul-bizi, arratsaldean ipar osagaia hartuko badu ere. Tenperaturen tartea 9 eta 20 gradu artekoa izango da.
Bihar lanbroa eta lainoa agertuko dira, eta zerua hodei gutxirekin egongo da goizean. Arratsaldean hodeitza handituz joango dela diote, gauean oso hodeitsu geratu arte. Are, ordu horren bueltan zaparrada txiki edo ertainak bota ditzake. Norabide aldakorreko haize ahula ibiliko da, eta maximoak dezente handituko dira, eguneko alde termikoa Gasteizen 7 eta 26 gradu artean geratuz.