Joan den asteburuan egin dituzte azken entseguak, Salburuko gizarte etxean, eta aurki dator orain arte egindako lana erakusteko unea: apirilaren 5 eta 6an izango da hori. Salburuan ospatu behar zen ospakizuna Lakuako gizarte etxeko Federico Garcia Lorca antzokian egingo da azkenean, eta, beraz, gune horrek bere gain hartuko ditu aurten parte hartuko duten 321 gaztetxoak, 70 taldetan antolatuta. Gogoratu beharra dago parte hartzaileen kopurua mugatuta dagoela, grabatu daitezkeen ikuskizun kopuruak baldintzatuta. Arrazoi horregatik parte hartzeko gogoa adierazten duten partaide guztien artean zozketa egiten da, eta modu horretan osatzen da behin betiko zerrenda.
Tokia ez da aurtengoan izango den aldaketa bakarra, eszenografia eta itxura aldetik ikuskizuna biziberriturik datorrelako. Oholtza gainean egindako lana are ikusgarriagoa egiteko, atzeko aldean hainbat pantailaz osatutako hondo batean irudiak erakutsiko dira. "Eszenografia aldatu dugu, gaur egungo ikus-entzunezkoetan dauden tendentzietatik abiatuta", aurreratu du Kantariko antolakuntzako kide Aitor Agirianok. Irudi korporatiboan ere nabarituko da aldaketa, Kantarik logo berria estreinatuko duelako. Izar batean abiatu dute diseinua, jakin badakitelako "izarrak direla oholtza gainean agertzen direnak".
Ikus-entzunezkoetan dauden azken joeretatik abiatu dituzte aldaketak
Diseinuan eta eszenografian egindako berrikuntzak Kantari moduko ikuskizun baten atzean dagoen lanaren parte bat baino ez dira, baina hilabete askoko esfortzua dago asteburu horren bueltan. Jakina denez, Gasteizko GEU elkartea, Goiena Komunikazio Taldea eta ALEA arduratzen dira Gasteizen izaten den ospakizunaz. "Asteburuko egun bakoitzean 15-20 lagun inguru lanean ari dira dena ondo atera dadin", azaldu du Agirianok. Askotariko lanak egin behar dira egunean bertan: gaztetxoak eta beren familiak artatu, aurkezpenak egin, argazkiak atera, bideokameraz grabatu, errealizazioa egin, internet bidezko streminga zabaldu edo ikuskizuna argiztatu, batzuk aipatzearren. "Hori guztia muntatu eta desmuntatzeaz gain, aurreko hilabeteetan lan asko dago, bai eta ondoren ere".
Zabalpen geografikoa
Arabarrek Gasteizko ikuskizuna ondo ezagutzen badute ere — bederatzigarren edizioa izango da aurtengoa—, gogoratu beharra dago Kantari Debagoienean hasi zela duela hemezortzi urte, eta Gipuzkoako herri askotan egiten dela: Urretxu-Zumarraga, Lazkao, Beasain, Azkoitia eta Donostian. Aurten, gainera, Nafarroara lehen jauzia egingo dute, aurreikusita dagoelako udazkenean Altsasun egitea, eta Bizkaian ere ikuskizuna egiteko aukera aztertzen ari dira zenbait udalekin.
Ohi bezala, argazki onenak webgunera eramango ditu ALEA aldizkariak, eta ikuskizuna egin eta zenbait egunera, gainera, saio bakoitzeko bideo osoak ikusi ahal izango dira alea.eus helbidean.
