Arabako Foru Aldundiak 95,2 milioi euro berreskuratu ditu 2024an iruzur fiskalaren aurkako borrokan. Ikuskapen zerbitzuaren bidez, guztira, 77,2 milioi euro berreskuratu dira: 55,6 milioi BEZari dagozkie; 11,2 milioi sozietateen gaineko zergari; eta 5,5 milioi PFEZri. Halaber, foru ogasunaren ohiko kudeaketa zerbitzuen bidez, 18 milioi euro berreskuratu dira. PFEZri dagokionez, 5,8 milioi izan dira, eta 5,1 milioi BEZari dagokionez.
Itziar Gonzalo Ogasun diputatuak batzar nagusien kontrolerako osoko bilkuran egindako agerraldian eman ditu datuok. Foru arduradunak azpimarratu duenez, "iruzur fiskala prebenitzea eta hari aurre egitea Arabako ogasunaren lehentasunezko helburuetako bat da, pertsona guztiek beren gaitasun ekonomikoaren arabera gastu publikoei aurre egiten laguntzen dutela bermatzeko".