Trantsizio medikua egin bitartean laguntzeko, zerbitzu berri bat abian jarriko du Osakidetzak. "Ospitalez kanpoko ingurune atsegin batean" harrera egiteko, trans pertsonen lehen mailako arretako zerbitzuak eskainiko ditu aurten osasun zentroetan, eta horietako bat Gasteizen izango da.
Neurri hau hartu aurretik, gainera, transei arreta emateko gida sanitario bat argitaratuko dute protokolo asistentziala eguneratzeko. Gidak, besteak beste, trantsizio medikuko prozesuetan jarduteko gomendioak jasotzen ditu, zirkuituen definizioa eta trans pertsonen eskubideak. Dokumentua osasun zerbitzuetako profesionalek eta transexualen eta familien elkarteek egin dute. "Dokumentu honek trantsizio prozesuetan jardunbide egokiak ezartzea erraztuko du, eta arreta eskatzen duten pertsonek ibilbide seguru eta eraginkorrez baliatzeko aukera izango dute, beren sexu edo genero identitatearekin denbora luzez eroso sentitzea lortzeko", azaldu du Maite Martinez Zabaleta doktoreak, Asistentzia Sanitarioko zuzendariak.
Gidak proposatzen du, batetik, lehen mailako arretako taldeen zeregina indartzea, hala helduetan nola adingabeetan, eta, bestetik, trans pertsonen lehen mailako arretako zerbitzuak sortzea. Horiek aurten jarriko dira abian, lurralde bakoitzean bana: Araban, Bizkaian eta Gipuzkoan. Zerbitzu horiek genero aniztasunaren arloko prestakuntza duten psikologoek osatuko dituzte, batik bat.
Gaur egun, Osakidetzaren erreferentziazko GIUa (Genero Identitatearen Unitatea) Gurutzetako ospitalean dago, eta 1.308 pertsona artatu ditu 2009n sortu zenetik. Arreta sanitarioa eskatzen duten trans pertsonen kopuruak gora egin du azken urteotan, eta igoera hori bereziki esanguratsua da adingabeen artean, Osakidetzatik nabarmendu dutenez. "Abian jarri zen lehen urteetan, artatutako pertsonen batez besteko adina 27 urtetik gorakoa zen, eta, azken urteetan, 18 urtetik beherakoa izan da". Zehazki, azken urtean 140 eskaera berri erregistratu dira eta horietatik 70 adingabeei dagozkie.