Soldaten eta lanaldiaren inguruko proposamena helarazi die Arabako Foru Aldundiak egoitza eta etxebizitza komunitarioen langileei, hitzarmen kolektiboaren inguruko lan gatazka gainditzeko asmoarekin. ELAk eta LABek kritikatu dute aldundiaren proposamen hori "partziala eta eskasa" dela, baina aitortu dute "bide onetik doala". Halere, sindikatuen aburuz proposamenak kanpo uzten ditu langileen beste aldarrikapen guztiak, alegia lan osasunaren prebentzioa, behin-behinekotasuna, bajen osagarria eta atsedena.
Orain, sektoreko patronalek aldundiak mahai gainean jarri duena osatu behar dutela uste dute ELAk eta LABek. Ildo horretan, joan den astean kontraproposamen bat bidali zioten aldundiari eta patronalei; eta bitartean grebarako deia egin dute berriro ere, apirilaren 9an eta 10ean.
Gorka Urtaran
Bestalde, arazoaren konponbidea sindikatuen esku dagoenik ukatu dute ELAk eta LABek, eta ohartarazi dute ez dutela "inoren presiorik edo xantaiarik onartuko". Ildo horretan, Gorka Urtaran Gizarte Gaietako diputatuari leporatu diote "kontakizun faltsu bat" sortu nahi izatea.
Era berean, gogoratu dute sei urte baino gehiago iraun duela Arabako egoitza eta etxebizitza komunitarioen gatazkak, eta deitoratu dute 40 greba egun baino gehiago behar izan direla, "azkenean, administrazio publikoek uler zezaten gatazka honetan interpelatuta daudela eta konponbidearen parte izan behar dutela".