Araba bizikletaz ezagutzeko planak

Arabako izaeraz, ondareaz eta gastronomiaz modu jasangarrian gozatzea proposatu du Aldundiko Turismo sailak. Horretarako, txirrindularitza modalitate guztietarako planak jaso dituzte Araba bizikletaz gidan. Hamabost bat guztira, familian egitekoak, profesionalak zein amateurrak, bizikleta motaren arabera sailkatuta. Araba bizikleta zaleentzat "paradisua" dela adierazi du Cristina Gonzalez Turismo diputatuak, "paisaia ikusgarriz, ibilbide berde eta bidezidorrez" betea.

Bost ataletan banatu dute gida, txirrindulari motaren arabera: Familia turismoa, gravel-a, mendiko bizikleta, errepidea eta "Araban barrena bidaiatzea". Argitalpena dagoeneko eskuragarri dago alavaturismo.eus webguneko "deskargak" atalean, baita txirrindularien aplikazioetan ere, eta laster izango da paperean ere Arabako udal eta turismo bulegoetan.

Ibilbideekin batera deskribapen labur bat eta argazkiak sartu dituzte, ibilbidearen mapa, distantzia eta desnibelaren fitxa. QR kode bat ere bai, ibilbidearen track-era sartu eta GPS gailuetan edo mugikorrean deskargatzeko. Ibilbide bakoitzaren zailtasuna eta iraupena ere zehaztu dituzte, eta baita inguruan ikus daitezkeen natura eta ondare erakargarrienak bildu ere.

Askotariko ibilbideak

Familian gozatzeko lau ibilbide daude, naturarekin lotuak denak. Gasteizko eraztun berdea, Vasco-Navarro trenaren bidean Estibalizko santutegiraino edo Landako hondartzaraino joatea eta, azkenik, Nerbioiko parke lineala, Aiaraldean. Gravel modalitaterako asfaltoa, pista eta bidezidorrak biltzen dituzten bi ibilbide proposatu dituzte: Vasco-Navarroaren bidetik Gasteiz eta Acedo arteko bidaia, edo Uribarri Ganboako urtegiko itzulia.

Mendi bizikletarako ibilbideetan berriz, "bidezidorrak, aldapak eta gailurrak" izango dira protagonista. Horretarako, Araban dauden bi BTT zentroak proposatzen dituzte, Izkikoa eta Valderejokoa, eta baita ibilbide bana ere Arrato-Badaia mendilerroan zein Gasteizko mendietan barrena. Asfalto gainean ibili nahi dutenentzat Herrerako itzulia aurkeztu dute, edota Uribarri Ganboako urtegiaren itzuli klasikoa.

Bizikleta gainean egun batzuk pasatzeko aukera ere eskaini dute, alforjak hartuta, "inguruneaz eta ekojolas espazioez gozatuz". Arabako Lautadako ibilbide zikloturista, edota Arabako Itzulia errepidetik.