Naiara Errasti Otañoren (Eskoriatza, Gipuzkoa) kartela aukeratu dute Arabako jaiei ongi etorria emateko. Hogei urtetik gorako esperientzia duen diseinatzaile grafikoa eta ilustratzailea da Errasti, eta Arabako Mooneki estudioaren sortzaileetako bat. Jugatx Gomez Guinea izan da gazte kategoriako irabazlea, Erritmoa ez da eteten proposamenarekin.
Errastik duela bost urte ere irabazi zuen lehiaketa, 2020an, nahiz eta garai hartan jaiak ezin izan ziren egin pandemiagatik, baina kartela, Arabako jaiak, etxez etxe lelopean, argitara eman zuten. Aurten, Araba, jaia has dadila lanagatik aukeratu dute; kartelaren konposizioan diseinu kolorista eta sinbolikoa nabarmentzen da, eta kartelaren erdian dagoen tronpeta jotzailearen irudia da protagonista, San Prudentzio eta Estibalizko Andra Mariaren omenezko jaien hasiera iragartzen duen pertsonaiari keinu eginez.
Berritasun gisa, 2025ean handitu egin da saridunek jasoko duten saria. Hain zuzen, sei finalistetako bakoitzak 350 euro jasoko ditu bere lanagatik. Hautagai irabazleak, Naiara Errastik, beste 1.400 euro jasoko ditu azken sariagatik.
