Atzo arratsaldean eguzki pixka bat jasota ere, gaur berriro egunak hodeitzera joko du. Batez ere arratsalde partean euria izan dezakegu, izaera trumoitsua har dezaketen zaparrada txiki-ertainekin. Haizeagatiko abisu horia bere horretan mantentzen da. Zenbait unetan hegoaldeko haize bolada indartsuek 110 km/h-ko abiadura gaindi dezakete. Tenperaturetan ez da aldaketa askorik igarriko, eguneko tartea hiriburuan 10 eta 16 gradu artean egongo delarik.
Antzeko tankera hartuko du ostiralak, zeru hodeitsu edo oso hodeitsuekin jarraituko baita. Egunaren erdiko orduetan ostarteak zabaldu daitezkeela dio Euskalmetek. Momentuz ez dute abisu horia luzatu, baina litekeena da hori gertatzea, hego osagaiko haizeak bolada oso gogorrak izango dituelako. Termometroak ez dira apenas mugituko, 9 eta 16 gradu arteko alde termikoan mantenduz.