Errementari eta Irati film luzeen ostean, hirugarrenari ekin dio Paul Urkijo zuzendari gasteiztarrak. Aste honetan hasi da filmatzen Gaua, eta hurrengo asteetan jarraituko du Euskal Herriko txoko desberdinetan.
Oraindik lantaldearen eta ezaugarri teknikoen inguruko daturik aurreratu ez badute ere, XVII. mendeko sorgin ehizan girotutako istorioa dela azaldu du zuzendariak. "Sorgin ehiza betean, Kattalin baserritik irtengo da gau batez, senarrarengandik ihesi. Baso ilunean galdurik, zerbait atzetik daukala igarriko du. Bide horretan, hiru emakume maitagarri topatuko ditu, arropa garbitzen ari diren bitartean beldurrezko ipuinak kontatzen eta herriko esamesak komentatzen dituztela. Harrituta, Kattalin konturatuko da esames horietako batzuk berari buruzkoak direla".
EITBk parte hartuko du pelikulan, eta Irusoinek, Ikusgarri Filmsek eta Vilaüt Filmsek ekoitziko dute.