Forestalia enpresak sustatuta, goi tentsioko linea bat eraiki nahi dute, Aragoitik Gasteizaino joango dena, Araban ebakuatzeko Aragoiko energia berriztagarrien zentraletan ekoiztutako energia. Horretarako, Aragoi eta Nafarroaz gain, Araba zeharkatuko luke, Asparrenetik Gasteiza.
Joan den urrian Arabako Batzar Nagusiek aho batez ezezkoa eman zioten proiektuari, sortuko lituzkeen eragin kaltegarriengatik. Orain, baina, EH Bilduk Espainiako senatura eraman nahi du "goi tentsioko autobidea" gelditzeko proposamena. Izan ere, Espainiako Trantsizio Ekologikorako ministerioak aurrera egiteko baimena emana dio proiektuari.
Goi tentsioko linea eraikiko balitz, Araban ebakuatuko lukete Aragoiko zortzi parke eolikok eta bi fotovoltaikok ekoiztutakoa. 165 kilometro inguruko luzera izango luke ebakuazio lineak, eta EH Bilduren iritziz kalte konponezinak sortuko lituzke. Horregatik, izapideak bertan behera uzteko eskatuko dute.
Ekoizpen lokala lehenetsi
EH Bilduko Josu Estarrona senatariak gogorarazi du sorkuntza azpiegitura ez dagoela Arabako lurraldean, urrun baizik, eta lehentasuna eman beharko litzaiekeela gertu dauden energia sortzeko instalazioei. "Ahalik eta energia-burujabetza handiena lortzeko lan egin behar dugu, ahalik eta eremu geografikorik hurbilenean. Zentzugabekeria da ebakuazio lineak erabiltzea, garraio lineen ordez”.
Gainera, argudiatu dute Aragoitik datorren ebakuazio linea Gasteizen hustuko balitz, Gasteizko azpiestazioek ez luketela gaitasunik izango gertuago dauden bestelako proiektuei erantzunik emateko. Ingurumen kaltea ere arrazoi nagusi gisa aurkeztu du EH Bilduk, eta gogorarazi du linea honek igaro asmo dituela Asparrena, Donemiliaga, Agurain, Iruraiz-Gauna, Barrundia, Burgu, Arratzua-Ubarrundia eta Gasteiz.