Egun nahasia izango dugu, zeru oso hodeitsuekin eta zaparrada iraunkor eta ugarirekin. Hain justu horregatik, Euskalmetek abisu horia ezarrita dauka eguerdira arte: 24 orduan 40 l/m² baino gehiago pila daitezkeela aurreikusi du meteorologia agentziak. Abisua ere finkatuta dago elurragatik, kota 900-1000 metrora egon daitekeelako (ekialdean 700-800 metrora kokatuko bide da). Lodierei dagokienez, aurreikuspenak dio mila metrora bost eta hogei zentimetro arteko elur geruza osatu daitekeela. Eolo iparretik ariko da, ahul-bizi, eta bolada gogorrak izango ditu. Tenperaturak 2 eta 6 gradu arteko aldean ibiliko dira hiriburuan, baina sentsazio termikoa -3 gradukoa izatera iritsi daiteke.
Abisua asteartean ere ezarrita egongo da, momentuz maila horian. Izotzagatiko eta elurragatiko abisu bana eman ditu Euskalmetek momentuz. Elur kota 600-800 metroan egon daitekeela diote, eta, AEMETen arabera, tenperatura bere horretan mantenduko da, 2 eta 6 gradu artean. Zeruak oso hodeitsu segiko du, eta zaparrada txikiak izango ditugu, batez ere egunaren lehen zatian. Arratsalderako hodeiak gutxituko omen dira.
