Atzo baino argi gehiago izango omen dugu gaur, hodeiak eta ostarteak tartekatuko direlako. Haizean ez da, ordea, aldaketa askorik egongo, eta bere horretan geratuko da, iparretik ufa eginez, eta bolada gogorrekin arratsaldean. Gasteizen termometroa 13 eta 21 gradu artean ibiliko da.
Aspaldiko partez lanbroekin hasiko da eguna, baina, ondoren, giro eguzkitsua gailenduko dela dio Euskalmetek. Arratsalderako erabat garbi egongo omen da. Ez dirudi Eolo gaseosarekin esperimentuak egiteko moduan dagoenik, eta, ondorioz, berdinetan ariko da, iparraldetik ufa eginez eta arratsalde partean zakartuz. Eguzkiaren lanak alde termikoan isla izango du, eguneko tartea 10 eta 24 gradu artean egongo baita.