AEA Alboko Esklerosi Amiotrofikoaren —gaztelaniazko ELA siglengatik ere ezaguna— nazioarteko egunarekin batera, Espainiako Kongresuan dauden talde politiko guztiei gaitzari buruzko legea ahalik eta lasterren tramitatzeko eskaria egin die, beste behin, ADELA Araba erakundeak.
Ohar batean, neuroendekapenezko gaitz larri honek jotako lagunen eskubideak babesteko eskatu du ADELAk. Gogora ekarri dutenez, badira gaixoak eutanasia eskatu dutenak, "bizi nahi izanda ere ezin dituztelako ordaindu bizitza duin bat egin ahal izateko behar diren zaintzak".
Bi urte baino gehiago igaro dira Espainiako Kongresuak, aho batez, legearen tramitazioa onartu zuenetik. "Ordudanik, egintzarik gabeko hitzak" baino ez dituztela jaso salatu dute ADELAko kideek. Aurten hiru talde parlamentarik hiruna proposamen landu dituzte, "nork bere aldetik". Hori dela eta, alderdiei eskatu diete "erantzukizunez" jokatzeko, eta lege testu bakarra adosteko. Salatu dutenez, gaur egun arlo publikotik gastuen %10 inguru baino ez dute ordaintzen, gainontzekoa gaixoen familiek jarri behar dutelarik. "Deigarritzat" jo dute Espainian eutanasia eskatzen duten lagunen %40 inguru AEAk jotako pertsonak izatea.
Jaialdi solidarioa
Nazioarteko egun honekin batera, elkartasun ikuskizuna antolatu dute Niño Jesus ikastetxean. 12 euroko ekarpena eskertuko dute Jon Ander magoaren ikuskizuna, Julen Axperen bakarrizketak eta Mario Enzoren txotxongiloak ikustearen truke.
Erakunde publiko ugariren eraikinak ere berdez argiztatuko dira gaur, gaitzaren gaineko atentzioa ekarri nahian. Larunbatean ere, Lakua hotelaren parean lasterketa solidarioa egingo dute.