Euskal kantugintza berriaren inguruko lehen 30 urteen inguruan egindako bidaia egin daiteke egunotan Montehermoso kulturunean, 100 diska erakusketaren bitartez. Bildumak garai gorabeheratsu haietan (1963-1993) lan egin zuten abeslariak eta taldeak biltzen ditu.
Karpeten diseinua, musika aurkezteko erabilitako bilgarria, ere bere horretan artea dela esan dezakegu eta euskal artista esanguratsuek hor ere utzi zuten haien aztarna. Erakusketak omenaldia egin nahi izan die euskara hizkuntza eta kontzientzia sozio-politiko gisa hedatzen arlo horretan aitzindariak izan zirenei. "Azal hauek eta horietan ateratzen diren iruzkinek garai hura bizi izan zutenentzat oroimenez beteta daude eta azken hamarkada hauetako euskal musika bakarrik ezagutzen dutenentzat sorpresaz beteta dagoen ibilbidean zehar eramango gaituzte", esan du Sonia Diaz de Corcuerak, Kultura zinegotziak.
Hitz gutxitan, ikusteko, entzuteko, ikasteko eta gozatzeko kultur ibilbidea dago jasota. Besteak beste, garai hartako zuzeneko kontzertuetako kartelak, biniloen azalak, beste objektu batzuk eta erakusketa aretoan bertan bata bestearen jarraian eskainiko diren hiru dokumental biltzen ditu erakusketak. Mikel Ezkerroren Mairuelegorreta; Iluntasunetik Argitasunera, EITBren Memoria eraikiz: Rock Vasco ¡¿Radikal!? eta Popgramak, 1977 eta 1981 artean entzungai izan zen RTVEko musika-programak, euskal musikari eskaini zion atala.
Erakusketa ekainaren 23ra arte egongo da zabalik Kulturunean eta bisita gidatuak ere egingo dira.
