Datozen bost urteetarako lan hitzarmen kolektibo baten inguruko akordioa lortu dute gaur goizean EAEko anbulantzien sektoreko enpresek eta ELA, CCOO eta UGT sindikatuek, azken hilabeteotan izan den greba mugagabeari amaiera emanez.
Jaurlaritzak eman du akordioaren berri. Ohar batean, Osasun Saila "pozik" azaldu da grebaren amaierarekin, osasun garraioaren "funtzionamendu normalari eragiten zion gatazka behin betiko konpondu delako".
Akordioa sinatu duten sindikatuek sektorean gehiengoa dutelako geratu da greba bertan behera.
LAB sindikatuak akordioarekiko jarrera kritikoa agertu du. Ohar batean adierazi dutenaren arabera, akordioa sinatu duten hiru sindikatuak "LABi bizkar emanda" aritu dira, eta Osakidetzako lankideekiko "homologazioa eta soldataz haragoko bestelako hobekuntzak alde batera utzi dituzte". Sindikatuaren esanetan, lortu duten "hobekuntza apurrek" arlo ekonomikoari baino ez diote eragiten.