Etxeko Laguntza Zerbitzuan murrizketarik ez ezartzeko eskatu dio Donemiliagako Udalak Arabako Foru Aldundiari.
Udalak ohar batean ezagutzera eman duenez, Gizarte Zerbitzuen Sailak iragarri du hemendik aurrerako eskatzaile berriei ez zaiela eskainiko gaur egun ehun lagun ingururi ematen zaien hiru orduko laguntza zerbitzua. Modu horretan, 0 gradutzat jotzen diren erabiltzaile berrien kasuan —pertsona autonomoak edo menpekotasun arriskuan daudenak— arta salbuespenezkoa izango da, eta soilik emango zaie zaurgarritasun handia edo gizarte bazterketa izateko arriskua dutenei.
Donemiliagan hamar laguni eskaintzen diete orain arta hori. "Mendekotasun arriskuan dagoen erabiltzaileari etxean egoten laguntzen dion oinarrizko zerbitzua" dela azpimarratu du udalak. "Azken batean, bere etxean egoteko eta komunitatean integratzeko aukera ematen dio, isolamendu egoerak saihestuz". Udalaren arabera, aldundiak emandako jarraibide horrek "agerian uzten du landa eremuan zerbitzu gutxiago eskaintzen direla", Gasteizen bizi direnen erabiltzaileentzat bere horretan mantenduko dutelako.