Goizari etekina atera beharko zaio, eguraldiari dagokienez bederen. Izan ere, hodeiekin batera ostarteak ere izango ditugu. Orduek aurrera egin ahala, ordea, hodeitzak handitzera joko du, eta euria ere egingo du. Hego-mendebaldeko haizeak joko du, bolada gogorrekin. Termometroari begira, minimoetan igarriko da alde gehiena, pixka bat baxuagoak izango direlako: eguneko tartea Gasteizen 5 eta 19 gradu artekoa izango da.
Bihar antzeko giroa izango dugu: hodeiak eta ostarteak tartekatuko dira, eta, noizean behin, zaparradaren bat izan dezakegu. Eolo indartsu ariko da ere, baina osagai nagusia iparretikoa izango da. Tenperaturek beheranzko joeran segituko dute, maximoak amilduko direlarik: 3 eta 12 gradu artean baino ez dira mugituko.