Zeru hodeitsu edo oso hodeitsuak izango ditugu gaur, eta noizean behin zaparradak bota ditzake, batez ere arratsaldetik aurrera. Bereziki arratsaldeetan ere haize indartsua izango dugu, gaur zein bihar. Euskalmetek abisu horia eman du horregatik. Haizegune izan ohi ez diren tokietan 60-80 km/h ingurukoak izan daitezke ufadak; haizeguneetan, berriz, 100 km/h-ko abiadura gaindi dezakete haizeteek. Tenperaturak 2 eta 15 gradu artean ibiliko dira hiriburuan, baina Arabako zenbait puntutan adi egon beharko zaio izotzari.
Biharko, antzeko agertokia izango dugu, baina Eguzkia ere ikusi ahalko da. Zaparradak bota ditzake, eta elur kota 1.000 metroren bueltan ibiliko da. Haizea zakar mantenduko da, eta tenperaturen tartea 4 eta 17 graduren bueltan ibiliko da.
Gainerako Aste Santuari begira, batez ere ostiralean eta igandean espero izatekoak dira euri gehienak. Larunbata hodeitsua izango bada ere, egun horretan ez da euririk aurreikusten goizean, baina bai ekaitzak jotzeko arriskua arratsaldean. Oro har, tenperatura nahiko baxuak mantenduko dira jai egun guztietan.