Oraindik Korrikaren jarraipenaren ondorengo ajearen pean dauden euskal kazetarien artean sormen literarioa sustatu nahian, Euskalmet S.A.-k iragarpen telegrafikoa egin du gaurkorako. "Eguzkitsu egongo da orokorrean. Ipar-ekialdeko haizea nagusi. Tenperaturan aldaketa handirik ez". Listo. Tenperatura horiek 9 eta 24 gradu artean ibiliko direla gaineratuko dugu, demokrazia osasuntsu baten berme ei den laugarren boterearen kontsolamendurako.
Biharko, joko gehiago eman digute. Hala, goizean goiz sortu daitezkeen lainoen ondoren giro eguzkitsua geratuko dela esan dezakegu. Halere, arratsalde partean hodeiak ugarituko dira, eta arratsa heldu orduko zaparraden bitartez askatu daiteke egun beroan zehar bildutako hezetasuna. Eolo hegotik ariko da goizean, eta iparretik arratsaldean. Tenperaturak are gorago egongo dira, Gasteizen 10 eta 24 gradu arteko alde termikoa espero izatekoa delako.