Tarteka zeru hodeitsuekin eta noizbehinkako euriekin hasiko da eguna. Eguerditik aurrera, baina, euria "etengabe" egingo duela iragarri du Euskalmetek. Mendebaldeko haizea ariko da, eta iparretikoa arratsaldean, bolada gogorrekin. Termometroari dagokionez, 2 eta 9 gradu arteko aldea iragarri dute Gasteizerako.
Astelehen arratsaldean finkatutako giroak segida izango du astearte goizean: goibel eta euritsu egongo bide da. Arratsaldetik aurrera, ordea, atertzera joko du, eta ostarteak zabalduko dira. Haizete indartsuak mantenduko dira, ipar eta ipar-mendebaldetik. Hotza izango da nagusi, alde termikoa 2 eta 6 gradu artekoa izango baita.