Hodeiak sartzen hasiko dira egunaren lehen partean, eta arratsaldean ugariko dira, oso hodeitsu edo estalita geratu arte. Euri txikia ere egin dezake arratsaldean. Antza, azken orduetan atertzera egingo du berriro, meteorologoak erotu ez badira. Hodeiekin batera haizete indartsuak etorriko dira; hori dela-eta, abisu horia eman du Euskalmetek, 15:00ak arte: haizeguneetan 100 km/h-ko abiadura gaindi dezakete haize boladek; haizegune ez direnetan, berriz, 60-80 km/h ingurukoak kalkulatu dituzte. Tenperaturei dagokienez, errusiar mendian ariko gara, 0 eta 17 gradu arteko tarte zabalekin.
Ostiralean elurra omen dator, baina mendian gora geratuko da. Hortaz, abisu horia errepikatuko da, baina oraingoan elurragatik. Aurreikuspenek diote elur kota 800 metroan kokatuko dela. Bereziki goizean zaparrada txikiak egongo dira, baina arratsaldean trumoi ekaitzak egon daitezkeela ere ohartarazi dute. Haize indartsuak ere egongo omen dira, baina informazio hau egiteko unean Euskalmetek ez du eman haizeagatiko abisurik biharko. Termometroetan, maximoak amilduko dira, eguneko tartea 1 eta 11 gradu artean geratuko baita.