Bolo-bolo daude podcast saioak gaur egun, eta askotarikoak aurki daitezke han hemen. Historia, misterioa, zinema, literatura... eta, jakina, umorea lantzen duten saio asko argitaratu dira azken boladan. Sareetan bazter guztiak busti dituen olatu horri heldu nahi izan dio ALEAk ere, eta ekoizpen propioko saioa aurkeztuko du aurki.
Gasteizko negu gordinean uda, hondartza eta giro atsegina gure etxeetara ekartzeko ardura izango dute Laura Galar eta Garazi Beramendi aurkezleek. Hasteko, eta bidean itotzen ez bagara, hilabetero argitaratuko da saio berri bat. Auskalo nora eramango gaituen korronteak, baina argi dago bidaia gozatzeko parada izango dugula behintzat.
Eta zein izen izango du saio berriak? Ba, ez dugu horren argi B-alea edo Balea izena izango duen azkenik. Argi duguna da zer eskainiko dion saio berri honek entzuleari. ALEA proiektuaren B aldea da B-alea; ALEA kazetaritza proiektuaren atzealdea. Gaurkotasunaren zurrunbilotik aldenduta, ur sakonetan murgiltzeko aukera ematen duen proiektu berria.
Aktualitatetik distantzia hartu eta itsaso barrenean bidaiatzeko elkarrizketa saioa, eta, seguruenik, ALEAn bestela entzun ahal ezingo genituzkeen kontuak entzuteko abagunea izango da.
Hondartza gurean
Nerea Arriola aktore eta irratiko esataria izango da lehen gonbidatua gure arrezifean. Supertxope bezala ezagutu genuen euskal youtuberra, eta ondoren Goazen telesaileko Maitane begirale bezala lortu du oihartzun zabalagoa. Donostiarra izaki, Kontxako bertuteak aurpegiratzera etorriko ote den ikusteko dugu oraindik.
