Atzoko eguraldiaren segida izango da gaurkoa: goizean goizeko lainoen ostean, hodeiak eta ostarteak izango ditugu. Eolo ere berdinetan ibiliko da, eta batez ere hegotik egingo du ufa, aparteko indarrik gabe. Tenperaturak nahiko epel mantenduko dira, Gasteizen 5 eta 18 gradu artean ibiliko direlarik.
Bihar, berriz, aldaketa igartzen hasiko da, eta zerua hodeitsu edo oso hodeitsu egongo da. Are, arratsaldean euri txikia egin dezake. Haizeetan ere aldaketak datoz: hego zein hego-mendebaldeko osagaian mantenduko den arren, askoz biziagoa izango da, eta bolada gogorrak izango omen ditu. Momentuz, aldaketa ez da tenperaturetara iritsiko, ia-ia berdinetan mantenduko baita eguneko tartea: 6 eta 18 gradu artean.