Ehiztari "laguntzailearen" figura sortzeko eskatu du PPk

Erredakzioa 2024ko ots. 9a, 18:13
Ehiztari talde bat, Baia ibaiaren parean, Zuian. Argazkia: JUANMA GALLEGO / ALEA

Araban ehiza arautzen duen legedia aldatzea proposatu du alderdiak, ehizan egonda ere "ehizarako baliabideak erabiltzen ez dituztenak" bereizteko. Diotenez, ehiztariak "zahartzen ari dira", eta ez dute erreleborik.

Batzar Nagusietako erregistroan gaur aurkeztutako proposamen batean, Alderdi Popularrak Araban ehiza arautzen duen legea aldatzeko eskatu du. Zehazki, Araban ehiza arautzen duen 8/2004 foru araudian puntu berri bat gehitzeko eskatu dute. Horren arabera, "ez da ehiztaritzat joko laguntzaile edo lagun gisa ehiza jardun batera doana". Hortaz, proposatutako definizioaren arabera, "laguntzailetzat" hartuko litzateke ehizan egonda ere "ehizarako baliabideak erabiltzen ez dituen" pertsona.

Popularrek "kezkagarritzat" jo dute gaur egungo ehizaren egoera, eta jardun aktiboan dauden ehiztariak "zahartzen" ari direla diote. PPren irudikoz, belaunaldi berrien erreleborik ez dago ehiztarien artean, eta horrek "ondorio negatiboak" izango ditu "oreka zinegetikoan".

"Ehiztariek ingurumenaren zaintzan egiten duten lana publikoki aitortzea funtsezkoa da", aipatu dute proposamenean. Lege aldaketa argudiatzeko, esan dute beharrezkoa dela "gizartea hurbildu ahal izatea eta hurbildu nahi izatea" ehizara, jardun horretan "modu aktiboan parte hartu behar izan gabe".

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide