Ziurgabetasun ugarirekin etorri dira urteko lehen elurteari buruzko iragarpenak. Gaurkorako "elurra edo egur bustia" iragarri ditu Euskalmetek, batez ere goizean. Abisu horia emana dute elurragatik, 18:00etara arte. Elur-kota 500-800 metro inguruan kokatu dute. 600 metroan elur geruzaren lodiera 0 eta 4 zentimetro artean egon daiteke. 1.000 metroan, berriz, 2 eta 12 zentimetro arteko tarte zabala kalkulatu dute. Gainerakoan, haizeak hegotik egingo du ufa, arratsaldean ipar osagaia hartuko duen arren. Tenperaturak 1 eta 5 gradu artean egongo dira Gasteizen.
Informazio hau idazteko unean (08:30) Opakuan eta Herreran baino ez da katerik behar, baina Segurtasun Sailak arreta berezia eskatu du Altuben, Bernedon, Gasteizko Mendietan, Gatzagan, Kurtzetan, Urduñan eta Zaldiaranen.
Ostegunerako ere mantendu dute abisu horia, baina soilik eguerdira arte. Goizean, lanbroa iragarri dute, bai eta prezipitazioak izateko aukera ere. Ondoren, hodeiak eta ostarteak tartekatuko dira. Ipar haizea ibiliko da, eta tenperaturen tartea hiriburuan 0 eta 5 gradu artean mantenduko da.