Laugarren urtez jarraian, Eusko Jaurlaritzako Kultura eta Hizkuntza Politika Sailak Eskatu euskaraz, eskaini euskaraz kanpaina abiatuko du berriz ere, merkataritzan eta ostalaritzan euskararen erabilera sustatu eta erabiltzaileak sentsibilizatzeko. Abenduan hasiko den kanpainak helburu bikoitza du: alde batetik, herritarrak eta kontsumitzaileak aktibatzea erosteko zein kontsumitzeko unean euskara erabil dezaten; bestetik, merkatari eta ostalariak gonbidatzea euskaraz gerturatzen zaizkion herritarrei euskaraz keinu egitera.
Aurtengo kanpainak, gainera, bat egingo du ekainean Jaurlaritzak, Nafarroako Gobernuak eta Iparraldeko Euskararen Erakunde Publikoarekin lankidetzan martxan jarritako Euskaraz Barra-Barra marka berriarekin (e//), estres linguistikorik gabe euskaraz aritzeko aukera ematen duten guneak identifikatzeko helburuarekin.
Kanpainaren laugarren edizioa Gasteizko Montehermoso Jauregian aurkeztu dute Araba, Bizkaia eta Gipuzkoako aldundiek, EUDEL eta UEMA erakundeekin eta hainbat udal, mankomunitate eta kuadrillarekin batera. Bertan izan dira, besteak beste, Hizkuntza Politikako sailburuorde Miren Dobaran, Gasteizko Euskara zinegotzi Maria Nanclares, Arabako Foru Aldundiko Berdintasun, Euskara eta Gobernantzako diputatu Jone Berriozabal eta Aenkomer eta Gasteiz On merkataritza elkarteetako ordezkariak.
Guztira, EAEko 131 udalerritan garatuko dute kanpaina; tartean, Arabako zortzitan:
- Gasteiz
- Aiaraldeko Kuadrilla:
- Aiara
- Artziniega
- Okondo
- Gorbeialdeko Kuadrilla:
- Aramaio
- Urkabustaiz
- Zuia
- Zigoitia
"Araba euskaldunago bat"
"Hemen gauden erakunde eta elkarte guztiok norabide berean egiten dugu arraun, helburu berarekin: bezeroak eta merkatariak konektatzea, harremanak euskaraz izan ditzaten. Bai ostalaritzako edo merkataritzako negozio batean sartzen diren pertsonek, bai arreta ematen dutenek, hasieratik euskaraz hitz egiteko beldurra galtzea", aldarrikatu du Maria Nanclares zinegotziak.
Bere aldetik, Jone Berriozabal Arabako Euskara diputatuak "sektoreak azken urteetan egindako ahalegina" azpimarratu du: "Araba euskaldunago batean, bertako enpresak gizarteak berak planteatutako aldarrikapenak gogoan hartzen hasi ziren, eskaintzen zituzten produktu eta zerbitzuei euskararen balioa erantsiz".