UAGAk nekazarien egonezinaren berri eman du, herrialdean zabaltzen ari diren proiektu fotovoltaikoen harira. Sindikatuak azaldu duenez, azken egunotan kezka ugari jaso dituzte afiliatuen partetik, enpresa fotovoltaikoen komertzialak egiten ari diren "etengabeko jazarpenagatik". Azpimarratu dutenez, enpresa horietako komertzialek nekazariak "hertsatu dituzte" beren proiektuetarako lursailak saltzeko edo alokatzeko.
Nekazarien sindikatuaren arabera, komertzialak nekazarien etxeetara joaten dira, "baita gauez ere", eta eguzki-plakak jartzeko lursailak saltzeko edo alokatzeko "presionatzen" dituzte. "Gezurrak ere erabiltzen dituzte, beste bizilagun batzuk kontratuak sinatu dituztela kasu", esan du UAGAk.
Sektorea jasaten ari den "jazarpen politika komertziala" salatu du UAGAk, eta zenbait energia enpresak beren interesak lortzeko "eskrupulurik gabe" eta "harrapakari bezala" jardutea.