Gaur gauerako haizeagatik zegoen alerta laranja pasata, Euskametek abisu horia mantendu du biharko. Gaueko haize zakarraren ondoren —kasurako, Gasteizen 109 km/h-ra iritsi dira—, Eolok menia pixka bat emango du, baina arratsaldetik aurrera berriro indartuko da. Gainerakoan, giro nahasia espero da, zeru hodeitsuekin eta euria egiteko aukerarekin. Arratsalderako ekaitzak jo dezake, eta elur kota 1200-1300 metro artean kokatuko da. Termometroan 5 eta 17 gradu arteko aldea egongo da hiriburuan, baina AEMETek zehaztu du sentsazio termiko minimoa 2 graduan egon daitekeela
Ostiralean zeruak oso hodeitsu jarraituko du, eta euria eta ekaitzak errepikatu daitezke, txingorra izateko aukerarekin. Elur maila bezperaren mailetan geratuko da goizean. Hego mendebaldeko haize gogorra mantenduko da, eta tenperatura maximoak amilduko dira, eguneko tartea 6 eta 13 gradu artean geratuko baita.