Urriaren 9an, 10ean eta 11n, astelehenetik asteazkenera, grebara jo dute azpikontratatutako anbulantzietako langileek. Joan den astean egin zuten bezala, gaur ere, hiru eguneko grebaren azken jardunaldian, elkarretaratzea egin dute Eusko Legebiltzarraren aurrean, tranbia moztu gabe. Hala ere, Ertzaintzak hainbat langile identifikatu ditu.
ELA, LAB, ESK, CCOO, UGT eta LSB-USO sindikatuek deitu dute greba, beren lan baldintzak Osakidetzakoekin parekatzea aldarrikatzeko. Baina oraingoz ez dute akordiorik lortu, ezta langileen eta enpresaren arteko hurbilpenik ere: "Borroka luzea eta gogorra izango da oraindik", ohartarazi dute sindikatuek, greba mugagabera jotzeko aukera mahai gainean jarriz. Urriaren 27an izango da mahai negoziatzailearen hurrengo bilera.
Gaur egun, anbulantzien zerbitzua Grup La Pau enpresa pribatu katalanaren esku dago Araban eta Bizkaian. Sindikatuek salatu dutenez, plantillak erosteko ahalmenaren %13 inguru galdu du, eta jaso duten eskaintza bakarra %2,5eko igoera da. Gaurko protestetan, gogor kritikatu dute Gotzone Sagardui Osasun sailburuaren kudeaketa, bere dimisioa eskatuz.