Ohi bezala, Araba Saria izaten da baskoniazaleentzat taldea bertatik bertara ikusteko lehen aukera, eta hala izango da gaurkoan ere. Denboraldi aurreko partiden ostean, eta Euskal Kopa, kantxan jazotako hezetasun arazoak tarteko, bertan behera utzi behar izan ostean, gaur aurkeztuko da talde gasteiztarra lehendabizikoz zaletuen aurrean.
Iritsi berriak diren jokalariak talde dinamikan murgildu eta erritmoa hartzen hastea ezinbesteko izango dute Peñarroyaren mutilek, halabeharrez, igandean hasiko baita ofizialki denboraldia. Breogan izango dute aurrez aurre, ligako lehen partidan, igandean, 17:00etan.
Hasteko, gaur Zurbaora gerturatzeko aukerarik ez duten zaletuek streaming bidez zuzenean jarraitu ahalko dute partida.