Patxi Zubizarreta idazleak (Ordizia, 1964) irabazi du 2023ko Espainiako Haur eta Gazte Literaturako Saria, Zerria (Txalaparta) lanagatik. "Kalitate narratibo bikainagatik eta kontakizunaren desafio ahalmenagatik" nabarmendu du epaimahaiak bere lana, "giza izaerari buruzko hausnarketa egiten duten deskribapen hipnotikoekin". Gainera, "irakurlearen memoria eta oraina astintzeko duen gaitasuna" azpimarratu du.
Zerriak Bereketen istorioa kontatzen du. Alpeetako gailurretan jaso du Bereketek Gasparden albistea: "Gorpu batzuk deskubritu ditut, bi gutxienez, Tsanfleuron glaziarrean". Albisteak gazte glaziologoa astindu eta asaldatu du, eta ez du onik izan historiaren jatorria eta egia lazgarria ezagutu arte, hortxe, Pirinioen bihotzean.