Araba alerta laranjan izango da beroagatik asteazken honetan. 40ºC temperatura maximoak izan daitezke, eta hori dela eta, Eusko Jaurlaritzako Segurtasun Sailak alerta laranja ezarri du 12:00etatik 21:00etara bitartean. Lurralde osoan tenperatura oso altuak espero dira.
Hala, Gasteizko Udalak muturreko bero egoeretarako aurrez ikusitako protokoloa aktibatu du eta herritarren osasuna babesteko eta bero-kolpeak ekiditeko neurri batzuk gomendatu ditu, batez ere arrisku-taldeei zuzenduta: adingabeak, adinekoak, gaixo kronikoak eta patologia batzuk dituzten pertsonak. Udalaren webgunean kontsulta daitezke oinarrizko aholku horiek.
Euskalmeten iragarpenen arabera, ostegunean, abuztuaren 10ean, Arabako hiriburuko gehieneko tenperatura 30 gradu baino gutxiagokoa izango da.