Atzoko egunaren parekoa izango da ostirala, hodeiak eta ostarteak tartekatuko direlarik. AEMETen arabera, euri pixka bat bota dezake ere. Ipar osagaiko haizea izango dugu, aparteko indarrik gabekoa. Gasteizen 13 eta 22 gradu arteko aldea espero da.
Asteburuari berari dagokionez, ez da ezustekorik espero, tenperaturetan ez bada. Goizetan lainoa agertu daiteke zenbait tokitan. Gainerakoan, hodeiak eta ostarteak izango ditugu, bai larunbat zein igandean ere. Larunbat goizean estaliago egongo dela iragarri dute. Modu berean, larunbat arratsaldean Eolo indartsuago ibiliko da, eta igande goizean hegoaldeko osagaia hartuko du. Termometroetan, gora egingo du galinstanoak: larunbatean 13 graduan hasi eta 27raino igo daiteke Gasteizen. Igandean, berriz, 14 eta 31 gradu artean ibiliko da. Ohi bezala, hegoaldean beroa askoz gehiago nabarituko da: igandean AEMETek 38 gradurainoko tenperaturak iragarri ditu Oionerako. Eguzki krema botatzeko egunak izango dira, indize ultramorea dezente altua egongo delako: 0 eta 11 arteko eskalan, indizea 8 eta 9 artean egongo da.