Gaurkoan ere zerua tarteka hodeitsua izango dugu, baina Eguzkia ere ikusi ahalko da, batez ere arratsaldean. Une horretan, baina, ekaitzak jo dezake, azken egunotan ohikoa izaten ari den moduan. AEMETen arabera, prezipitazioa egiteko probabilitatea %85ekoa da. Hegoaldetik ufa egingo du Eolok, eta beroa mantenduko da: 13 eta 27 gradu arteko aldea espero da Gasteizen.
Bihar estaliago egongo dela iragarri du Euskalmetek, eta hodeiak izango ditugu nagusi. Arratsaldean hodei horiek euria askatuko dute, baina, momentuz, ez da espero ekaitzik. Auskalo. Bezperan bezala, hegoaldeko haizea espero da, eta dezenteko beroa: 15 eta 26 gradu artean ibiliko da galinstanoa.