Errota Zaharra elkartearen eskutik, auzoko komunitate kultural desberdinak biltzen dituen Errota Anitza egitasmoa ezagutzeko aurkezpen jaia antolatu dute larunbatean, hilaren 6an. Elkarbizitzaren eredu, auzokideak elkartzeko eta aniztasuna bultzatzeko festa izango da, antolatzaileek azaldu dutenez.
Auzoaz hitz egiteko saioarekin emango diote hasiera egunari, 12:00etan, auzokideen arteko harremanak sendotu eta dituzten kezkak partekatzeko. Ordu berean, haurren txokoan, Ane Gebara ipuin kontalariak egingo die ongietorria txikienei.
Herri bazkariaren ostean, 16:00etatik aurrera, musika izango da nagusi; poesia txokoa, bertsorap emanaldia, Karabankunda perkusio afrikarra eta Royal Cloud dantza urbanoa ez dira faltako.
