Poesiak modu batean edo bestean beti inguratu du Itziar Rekalde (Bermeo, 1955) ipuin kontalaria, baina oraingoan paperera eraman ditu aspaldi buruan zebilzkion poemak. (H)aingura poema liburuarekin egin du jauzi literaturara, eta aurrez gaztelaniaz argitaratutako lana (Ancla) euskaraz aurkeztu du, Lupi argitaletxearen eskutik. Zuloa liburu dendan egingo du aurkezpena, martxoaren 23an, 19:00etan.
Itsasoa ardatz, Rekalderen ibilbidean zehar jasotako esperientzien arrastoa nabari daiteke liburuan. "Niretzako funtsezkoak diren bi hitz ikasi nituen haurtzaroan: sustraia eta aingura. Biek eusten gaituzte. Sustrairik gabe ez gara, ezin ditugu gure haziak zabaldu, ezta kanpotik ongarri berriak ekarri ere. Geldiarazi eta desbideratuko gaituzten haizeetatik edo korronteetatik babesten gaituen aingurarik gabe, ezingo genioke norabideari eutsi. Sustraitu gaitezen bada eta aingura altxa dezagun haizea egokia denean. Bidai ona izan dezazuen", idatzi du kontalari eta ALEAren kolaboratzaileak liburuaren hitzaurrean.