Bingen Zupiria Eusko Jaurlaritzako bozeramaileak prentsaurrekoan jakinarazi duenez, Zaballako espetxeetako langileek 08:00etan izan dute gertakariaren berri, zenbaketa egiteko ziegak ireki dituztenean. 22 urteko gaztea bizi zantzurik gabe aurkitu dute, eta guardiako medikuei deitu badiete ere, ezin izan dute ezer egin gaztea suspertzeko.
Zupiriak azaldu duenez, gertakarien berri eman diote guardiako epaitegiari, baina Justizia Zuzendaritzak ere ikerketa abiatu du gertatutakoa argitzeko. "Gardentasun proba" gisa eman dute informazioa, baina oraingoz ez dute xehetasun gehiago emango. Presoak zigor irmoa zuela adierazi dute Jaurlaritzatik, eta "delitu larri" batengatik espetxean zegoela. Horrez gain, azaldu dute ez zegoela suizidioen prebentziorako programan, eta ez zuela "biolentzia zantzurik".
Bestalde, espetxeko zuzendaritzak jakinarazi du hildakoaren senideei informazio guztia emango diela, baita "behar duten laguntza guztia" ere.