Osakidetza salba dezagun lelopean, ELA, SATSE, LAB, SME, CCOO eta UGT sindikatuek deituta, milaka lagun bildu dira larunbatean Gasteizen eta EAEko beste bi hiriburuetan "osasun publikoaren desegitea" salatzeko eta "Osakidetzaren egiturazko arazo larriei konponbideak" eskatzeko.
Sindikatuek salatu dute osasun langileen baldintzek "etengabe okerrera" egin dutela, eta arazo horiek pandemia aurretik datozela. Besteak beste, gogora ekarri dute kategoria guztietan behin-behinekotasuna %50etik gora dagoela, eta langileek "lan gainkarga sistematikoa" pairatzen dutela. Sindikatuen esanetan, hainbestetan aipatu den medikuen eskasiaren atzean "lan baldintza prekarioak" daude. Horregatik, Jaurlaritzari eskatu diote "kalitatezkoa izango den sistema bermatzeko baliabideak" ezar ditzala.