Tarteka zeru hodeitsuak izango ditugu, hegoaldean garbiago mantenduko bada ere. Arratsalderako hodeiak gutxituko direlakoan dago Euskalmet, eta nahiko oskarbi geratuko da. Haizeak iparretik egingo du ufa, baina demaseko indarrik gabe. Tenperaturei dagokienez, hotza izango dugu, eta izotzarekin adi ibili beharko da: Gasteizen -1 eta 8 gradu arteko aldea espero da.
Astearteari dagokionez, lainoarekin hasiko da eguna, eta goizen goizetik hodeiak ugarituz joango dira, zerua estali samar geratu arte. Elurrarekin tentuz ibili beharko da berriz ere, kota 500 metrora jaitsi daitekeela kalkulatu duelako euskal meteorologia agentziak. Haizea ahul eta aldakor ibiliko da, batik bat iparretik etorrita. Beste behin ere, izotzari adi egon beharko da, errepide eta aldapetan: hiribururako -2 eta 6 gradu arteko aldea iragarri du AEMETek.