Ofiziala da: otsailaren 7an, Espainiako Gobernuaren Ministroen Kontseiluak garraio publikoan maskara eramateko derrigortasunaren amaiera ekarriko duen dekretua onartuko du. Neurria hurrengo egunean, hilaren 8an, sartuko da indarrean, Estatuko Aldizkari Ofizialean (BOE) argitaratzen denean.
Hortaz, 12 egun barru musukoa derrigorrezkoa izateari utziko dio autobusetan, trenetan, metroetan eta taxietan, baina "gomendagarria" izaten jarraituko du. Gainera, osasun zentroetan, adinekoen egoitzetan eta farmazietan mantenduko da oraindik ere.
Duela ia hiru urte ezarri zen neurria garraio publikoan, 2020ko maiatzaren 4an, pandemiaren lehen olatuan. Hala ere, denbora horretan Espainiako Gobernuaren aholkularitzan aritu diren adituen ustez, egoera epidemiologikoa "oso egonkorra" da une honetan. Ez Gabonetako oporrek ez Txinako Covid Zero politikaren amaierak ez dute kutsatzeen zein ospitaleratzeen gorakadarik eragin.