Miranda de Ebroko (Burgos) 74 urteko gizon jubilatu bat atxilotu dute azken orduetan, besteak beste, Espainiako Gobernuko Presidentetzara, Ukrainak Madrilen duen enbaxadara eta Defentsa Ministeriora 2022ko azaroan sei bonba-gutun bidaltzea egotzita.
Hainbat iturriren arabera, atxilotuak Gasteizko Udaleko funtzionario gisa lan egin zuen. Gaur egun, bakarrik bizi zen Miranda Ebron. Oraingoz, ez zaio inolako atxikipen politikorik egotzi, eta, lehen hipotesien arabera, bakarrik jardun zuen. Azken egunetan, The New York Times egunkarian, AEBetako zerbitzu sekretuen inguruko iturri batzuek Errusiako talde ultraeskuindarrekin lotu dituzte erasoak; polizia operazio hau, berriz, ez dator bat teoria horrekin.
Espainiako Poliziak egin du atxiloketa, eta ostiralean deklaratuko du Auzitegi Nazionaleko Instrukzioko 4. Epaitegi Zentralean. Epaileak terrorismo delitu gisa ikertzen ari da auzia.
Antza denez, bonba-gutunen lehergaia oso oinarrizkoa zen: funtsean petardo-bolbora eta piroteknia, detonazioa eragiteko gailu txiki batekin prentsatuta. Batzuek errodamenduak eta torloju txikiak zeramatzaten metraila gisa. Pakete horietako bat, Torrejon de Ardozeko Aire Baseko Europako Batasuneko Sateliteen Zentrora bidalitakoa, ez zen lehertu, eta bertatik DNA atera ahal izan zuten.
Ondoren, DNA datu-basean erregistratu gabe zegoenez, paketeak banatu ziren posta-bulegoetako kameren irudiak jaso zituzten, ibilbidea berreraikitzeko asmoz. Azkenik, erabilitako gutun-azalak saltzen zituen enpresa aurkitzea lortu zuen Espainiako Poliziak, erosleetako bat Burgos probintzian bizi zela egiaztatuz. Ustezko egilearengana iristeko funtsezko beste pista erabilitako zigiluak izan ziren, bulego gutxi batzuetan banatutako edizio mugatu batekoak baitziren.