Mendialdea eta Arabako Errioxa, trantsizio energetikora bidean

'Erreminta-gida'-ren aurkezpen jardunaldia, Arraia-Maeztun. / Argazkia: IHOBE

EEEk eta Ihobek Erreminta-gida programa aurkeztu dute, Mendialdeko eta Arabako Errioxako udalei energia erronkei aurre egiteko tresna berriak eskaintzeko. Besteak beste, trantsizio energetikorako 30 teknikari kontratatzeko laguntza izango dute.

Programa ostegun honetan aurkeztu dute Arraia-Maeztun, klima krisiari aurre egiteko eta energia aurrezten laguntzeko udalerri zein eskualdeei zuzendutako laguntzekin batera. Horrez gain, energia aurrezteko berogailuen tenperatura 19ºC-ra mugatzera animatzen duen kanpainarekin bat egin dute ekimenaren sustatzaileek.

Bi erakundeak azken hilabeteetan egiten ari diren hamaika aurkezpenetako honetan, Energiaren Euskal Erakundeko (EEE) zuzendari nagusi Iñigo Ansola eta Ihobeko Ingurumen Jasangarritasunaren arloko zuzendari Xabier Gonzalez Vegas izan dira, Mendialdeko zein Arabako Errioxako alkate, zinegotzi, mankomunitateetako kide eta kuadrilletako teknikariekin.

Energiaren, klima aldaketaren eta jasangarritasunaren arloan ekimen berriak garatu ahal izateko tokiko administrazioei laguntzeko programa da Erreminta-Gida. Aurkeztutako tresnen artean, tokiko administrazioetan trantsizio energetikorako 30 teknikari kontratatzeko aukera nabarmentzen da, EEEk eta Ihobek Lanbiderekin eta Novia Salcedo Fundazioarekin lortutako akordioari esker.

2030. urterako, tokiko administrazioek kontsumoa %35 murrizteko eta energia berriztagarrien %32 lortzeko erronka dute. Ildo horretan, adibidez, 19a nonahi dago, seinale bat ote? kanpainari babesa eman diote jardunaldira bertaratutakoek: berogailuen gehieneko tenperatura 19ºC-ra mugatuz energia aurreztea da kanpainaren helburua.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide