Babestutako eraikin bat eraitsi dute Forondan makro-egoitza bat eraikitzeko

Atzean, Forondako Markesaren Jauregiko lursaila. / Argazkia: ZARATEMAN

2020an eraitsi zuten eraikina, Gonzalo Antonen Promociones Murgoitio enpresak egoitza-gune bat eraikiko duen eremuan. Arabako Aldundia gertatutakoa ikertzen ari da.

Aste honetan El Correo egunkariak jakitera eman duenez, Arabako Foru Aldundiak ikerketa bat abiatu du Forondako Markesaren Jauregiaren eremuko eraikin babestu baten desagerpenaren inguruan. Gaur egun, lursail hori Gonzalo Antonen Promociones Murgoitioren jabetzakoa da; izan ere, 200 plaza baino gehiagoko adinekoen egoitza bat eta gastronomia eskola bat eraikiko dituzte bertan. 2019an utzi zion Aldundiaren jabetzakoa izateari, 1,2 milioi euroren truke, eta enpresari arabarrak 24 milioi euroko inbertsioa egiteko asmoa du.

Gasteizko Udalak Aldundiari jakinarazi dio eraikina Hiri Antolamenduko Plan Orokorraren (HAPO) katalogoan babestu beharreko elementu gisa agertzen dela, birgaitzeko eta berritzeko erregimen berezi batekin. 2022ko urriaren 7ko txostenaren arabera, udal teknikariek otsailean antzeman zuten "eraikin osoa eraitsita" zegoela. Antza denez, 2020an eraitsi zuten eraikina, baina teknikariek ez dute lortu data zehatza zehaztea.

Txostenean, udal arkitektoak eta hirigintza-diziplinako buruak ohartarazten dute gertatutakoa "arau-hauste oso larria" dela, Euskal Kultura Ondarearen Legearen arabera: 84. artikuluak "babestutako kultura-ondasun higiezinak eraisteari edo suntsitzeari" egiten dio erreferentzia. Legeak milioi bat euro arteko isunak aurreikusten ditu, eta, gainera, "erantzuleek, ahal denean, berreraiki" egin beharko dutela dio.

Une honetan, Aldundia gertatutakoa ikertzen ari da, eta, momentuz, obra-espedientearen inguruko dokumentazio guztia eskatu dio Udalari. Ikerketak aurrera egin ahala, zehapen-prozedura abia lezake Gonzalo Antonen enpresaren aurka.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide