Ehun urte beteko ditu Gasteizko Gargantuak ostiral honetan. 1923ko urtarrilaren 6an atera zuten lehen aldiz Gasteizko kaleetara erraldoien eta buruhandien udal konpartsako pertsonaia. Bi idik bultzatuta, Errege Magoen kabalgatan hartu zuen parte.
Garai hartan, kabalgata errege-egunean bertan egiten zen, ez gaur egun bezala bezperan. "Horregatik, Gasteizko Udalak ehun urte geroago gure hiriko ospakizunetan oraindik ere neska-mutilek irensten jarraitzen duen erraldoi honentzako urtebetetze zorion-agurra prestatu dugu", adierazi du Maider Etxebarria alkateordeak.
Zorion-agurra Jimmy Bidaurreta musikariak, Udal Folklore Akademiako irakasleak, sortu du eta www.vitoria-gasteiz.org Udalaren web-atarian egongo da entzungai urtarrilaren 6tik, ostiraletik, aurrera. "Gainera, mendeurrena ospatzeko gasteiztar guztiek egindako opari gisa, 2023an zehar, pertsonaiaren arropa guztia berrituko dugu Andre Maria Zuriaren jaietarako estreinatzeko helburuarekin. Zorionak, Gargantua, eta beste 100 urte bete ditzazula zorionez eta festaz beteta!".