STEILAS sindikatuak eta Dom Campistron ilustratzaileak elkarlanean sortutako Aske izan koloretan ipuina aurkeztu dute. Haur Hezkuntzako ikasleei zuzendutakoa, "aniztasuna" irudikatzen duen tresna izan nahi du, "sexu edo genero estereotipoak arauaz gaindi tratatzen dituena".
Euri, Maixa, Xole, Gexan eta Mixel lagun talde bat dira, eta haien gorputzak eta identitateak modu librean bizi dituzte. Ondoan, Zangaluzeak dituzte, araua irudikatzen duten pertsonaiak. "Zangaluzeen bitartez sistema bitarra, heterozuzena, neska edo mutil izateko modu konkretua bultzatzen duen errealitatea irudikatzen dugu. Sistema horren transmisore izan daitezkeen komunikabideak, gurasoak, helduak, antolaketa arkitektonikoak... Zangaluzeen irudiaren bitartez, agerian uzten digu sinesmen-sistema bat dela eta, gainera, murriztailea eta askatasunaren kontrakoa", azaldu dute ipuinaren aurkezpenean. Lagun talde honek erakutsi nahi du badagoela bizitzeko beste modu bat. "Euren jarrerarekin, egunerokoan eman daitezkeen egoera batzuk irauli daitezkeela adierazten digute, jarrera mugatuekin aniztasunean bizitzea zaila da eta".
STEILAS sindikatuak duen egoitzan eta Gasteizko Zuloa liburu dendan ere eskuratu daiteke.