Gazteen musika talde gustukoen inguruko informazioa jaso nahi du Gasteizko Udalak, datozen jaietan antolatuko dituzten kontzertuak antolatzen hasteko. Gazteria eta Kultura Zerbitzuak elkarlanean antolatutako ekimenaren bitartez, 16 eta 30 urte bitarteko gazteek Andre Mari Zuriaren jaietarako nahi dituzten musika proposamenak batuko ditu.
Parte hartu ahal izateko, Gazteria Zerbitzuaren Instagrameko profilean (vggaztea) parte hartu eta galdera honi erantzun beharko diote: "Noren musika entzun nahiko zenuke Andre Maria Zuriaren hurrengo jaietan?".
Galdetegia erantzuteko epea abenduaren 22ra arte izango da. Gainera, parte hartzaile guztien artean urtarrilaren 6an Jimmy Jazz aretoan Chill Mafia taldeak eskainiko duen kontzerturako bi sarrera zozketatuko dituzte.
Gasteizko Kultura Zerbitzuak gazteen proposamenak kontuan hartuko dituela gogoratu du, hala ere, hainbat irizpide bete behar ditu, tartean, hizkuntza irizpideak, emakumeen presentzia bermatzea, edota estilo eta adin desberdinentzako programazioa eskaintzea.