1950. urtean, Gasteizko Udal Aurrezki Kutxa sortu zenetik ehun urte bete ziren, eta Pio XII.a Aita Santuak ezarritako jubileo urte santua izanik, gurutze bat kokatu zuten Zaldiaran mendiaren tontorrean.
Manuel Iradier Txangolari Elkarteak, Juan Salazar buru zuela, berehala ekin zien eraikitze lanei, eta urte bereko azaroaren 12an jarri zuten gurutzea, mendizale-postontzi bitxi batekin batera. Izan ere, buzoia Arabako Gebarako gazteluaren erreplika txiki bat zen.
72 urte luze igaro dira ordutik. Urteen zein klimatologiaren poderioz, postontziaren egoerak okerrera egin du azken urteetan. Horren aurrean, duela gutxi, postontzia Pintore kaleko lokaletara eramatea erabaki zuen Manuel Iradier elkarteak, korrosioak eragindako kalteak konpontzeko. Beltran de Lubiano Tailerraren laguntza desinteresatuari esker egin ahal izan dute hori, eta akatsak konponduta geratu direla iragarri du elkarteak.
Horregatik, igande honetan, abenduaren 11n, 72. urteurrenaren bezperan, Manuel Iradier Elkarteak buzoi zaharra birkokatzeko ekitaldia antolatu du, 11:30ean, eta parte hartu nahi duten mendizale guztiak gonbidatu dituzte.
