Pandemiak eragindako bi urteko etenaldiaren ostean, indarberrituta datoz Maurgako jaiak, Martin Deunaren ohorez, azaroaren 11tik 13ra. Jai Batzordeak gogo handiz antolatu ditu aurtengo ospakizunak; izan ere, 2019an ospatu zituzten jaiak azkenengo aldiz.
Zigoitia udalerrian, Gorbeiako Parke Naturalaren atarian eta basoz inguratuta dago Maurga. Berrea garaian, oreinak herriko protagonistak bihurtzen dira; horregatik, hain zuzen ere, Martintxo "oreina" herriko kanpandorretik jaisten da urtero. Ostiral honetan, 19:00etan, berriz ere jaitsi da, aurtengo jaiei hasiera emateko.
Martintxoren jaitsieraren ostean, ostiralean, pregoia, txokolatada eta mozorro festa egingo dituzte. Ondoren, Txarli Magoa, patata tortilla txapelketa, pintxo potea, Arrimu taldea, mozorro txapelketa, Apolo G's taldearen kontzertua eta DJak izango dira, egunsentira arte.
Larunbaterako egun osoko egitaraua antolatu dute: Masterchef haurrentzat, bermuta, igel txapelketa, herri kirolak, puzgarriak, trikipoteoa, herri bazkaria, txapelketak, dantza plaza, Izenbarekuak txaranga, bokatak, Gauargirekin jaia, bingoa, herri jokoa eta DJak. Berriz ere, hurrengo goizera arte luzatuko da ospakizuna, eta 08:00etan familia argazkia aterako dute, gaupasa gogoangarriaren oroimena gordetzeko.
Azkenik, igandean, meza, puzgarriak, luntxa, sari banaketa eta bolo txapelketa izango dira, bizirik jarraitzen duten bizilagun zein bisitarientzako.
EGITARAUA