2023ko otsailaren 11n banatuko diren Goya sarien 37. ediziorako bidearen azken txanpan sartzea lortu dute hiru film labur arabarrek. Izan ere, aurre-hautatutako 35 filmeen artean daude Yungay 7020 (Elena Molina eta Raquel Calvo), Cuerdas (Estibaliz Urresola Solaguren), eta Tula (Beatriz de Silva), nazioarteko hainbat zinemalditan sari ugari lortu ostean.
Yungay 7020 filmaren kasuan, dokumentalen kategorian aurre-hautatu dute; beste biak, Cuerdas eta Tula, berriz, fikziozko kategorian aukeratu dituzte. Hemendik aurrera, akademikoek hainbat asteko epea izango dute bozketak egiteko, eta horien bidez ezarriko da izendapenen behin betiko zerrenda.
TRAILERRAK
Cuerdas
Rita desegiteko arriskuan dagoen abesbatza bateko kide da: entsegu gela bat alokatzeko diru laguntza galdu dute. Taldeak erabaki behar du haranean kutsadura eragiten duen enpresaren babesa onartzen duen ala ez.
Tula
Tula emakumeen ikastetxe bateko komunak garbitzeaz arduratzen da. Bere lanaldia aldatu egiten da zuzendariaren hamalau urteko alabak haurdun dagoela aitortzen dionean.
Yungay 7020
1970ean, elur-jausi batek Peruko Yungay hiria lurperatu zuen. Bizirik atera zirenek hondamenditik kilometro batera berreraiki zuten. Behin sakratua izandako Huascaran mendiak hitz egiten du. Gogoratzen dutenek badakite entzun egin beharko luketela.