Gasteizko epaile batek uko egin dio bere gurasoek aukeratutako izenarekin haur jaioberri bat inskribatzeari. Gurasoek umearentzat aukeratutako izena Hazia da, eta izen hori duen neskatorik ez dagoela argudiatuta hala izendatzea baztertu du epaileak. Legeak ematen dion aukera baliatuta, eta gurasoek bestelako alternatibarik aurkeztu ez dutenez, gainera, Zia izena jarri dio epaileak umeari, latinez "hazia".
Erregistro Zibilean inskribatzea ukatzeko epaileak erabiltzen dituen arrazoien artean, halaber, Hazia substantiboa dela esan du epaileak, eta "konnotazio negatiboa" izan dezakeela esanahiak. "Euskaltzaindian ere galdetu genuen, eta inolako arazorik ez zegoela esan ziguten, adiera ugari dituela "hazi"-k, eta haurra hala izendatzeko arazorik ez. Gurasoek ondo aukeratutako izena da Hazia, eta hala defendatuko dugu", adierazi du Rosa Maria Manteiga haurtxoaren amonak epaitegien aurrean.
Familia ez dago ados epailearen erabakiarekin, eta Segurtasun Juridiko eta Fede Publikoaren Zuzendaritza Nagusira joko dutela iragarri dute.